الشاعر راضى على الطهطاوى قصيدة "قوليلى مين"

مين اللى
عايز شمسك تغيب


ومين اللى
رافض جرحك يطيب


ومين اللى خلا حبيبك غريب


وجايب مشاكلك ومانع حلول


**


مين اللى
باعك فى سوق احتكار


وقصقص
ومصمص وخصخص جدار


وجابلك
ضلامك فى عز النهار


وعايز نجومك فى ليلك تزول


**


مين اللى
خانك وجابلك قيودك


وغشك وهانك
وأخلف عهودك


ومين اللى شانك
وقاطف ورودك


وعايز
جناينك تعيش الذبول


**


مين اللى
زوَّد ليكى دموعك


وعايزك
تتوهى ويطفى شموعك


ومين اللى
نفسه يحطم قلوعك


ونفسه مواجعك طريقها يطول


**


مين اللى
عايز يفرَّق ما بينا


ومين اللى
قايل دا دينهم ودينا


هيفضل
تماسك نسيجنا يزينا


وعمره
ماتقدر تهزك فلول


**