المرحلة الثانية للمسابقة قسم الشعر العامى( تم فتح التصويت )

الأشعار المشتركة فى المرحلة الثانية لقسم شعر العامى
-----------------------------------


قصيدة (متغربين ) ناصر على

تعبانين جوة الوطن
متغربين

تايهين فى غابة من المحن
مستنيين

والحلم صرخة بتندفن
جوة السنين

واهين واه يا اهل البلد
يا مطحونين

والدفة حادفة مغمضة
شمال يمين

محتارة ليه يا سوسنة
واخدانا فين

ارجعيلى شمعة قايدة نورى
ليلى الحزين

ارجعيلى وردة نادية عطرها
يمحى الانين

طمنينى فرحينى يام كل
المغرمين

اصل انا مزروع فى طينك
طب قوليلى كلمتين

لو مفيش مكان فى حضنك
طب قوليلى نروحوا فين

برضه خايف تهرسينا
يبقى تهنا مرتين

عشمانين يا طاهرة اوعى
مش هنحمل بطحتين

احنا منك وانتى لينا
واحنا ليكى ضى عين

ساكتة ليه ماتقومى يالا
لمى كل الزعلانين

قومى يالا صلى فجرك
واحنا هنردد امين

---------------------------------

أحمد إبراهيم محمد

يا أســـد خليـــــك شجاع ده طبع الأسود الشهامه

والشرف لو مره ضاع تضيع معاه الكرامــــة

والأسد يصارع سبـــاع مش يهاجم حمامــــــــه

ــــــــــــــــــــــــــــــــ

أسد على شعبــك يا غـــادر وفى الحرب تبقى نعامة

حرر الجولان لو كنت قادر من ايــد اليهـــود اللمامــة

نصــــيحتى لازم تغــــادر قبـــل ما تشـــوف الندامة

ـــــــــــــــــــــــــــــ

فى أدلب وجسر الشغور ح تــلاقى أســودة يــامــا

والأسد ح تلقاه جســـور مش زيك ف غاية التلامه

وكلمتــه كتبـــها بنـــــور وشهادتــــه هى العـــلامة

ـــــــــــــــــــــــــــــــــــ

بشار وما فيش بشارة جـــزار ويللا الســــــلامه

سكينه حامية شرارة وتدبــح فى غايــة الصرامة

فى شعبه فاتح جزارة والشهدا فى الحوارى يامــا

ــــــــــــــــــــــــــــــــ

شعبنا فى سوريا همام ووحـدتنـــا كانت عظيــــمة

وكنا عايشين ف سلام والعيشــــة كانت كريـــــــمة

وقوتنا كانت تمـــــــام والعدو ضربناه بالقديـــــمة

ـــــــــــــــــــــــــــــــــ

يا شعب شعللها نـــــار علــى ولاد اللـئيــــــــمة

أخرتها والله أنتصـــــار بالاصرار ويا العزيمة

وبكره ح يطلع نهــــــار وسوريا ح تفضل سليمة

------------------------------------

أحمد راضى

ايه اللى صاب العروبه.. شتت مابين البلاد؟

آدى أمه باعت ولدها, وجيرانها حاضره المزاد

ياحسره دقت طبولك.. على رؤوس العباد

فى عيدنا نشرب مذ له ,ولبسنا توب الحداد

*****

الهم مخلوق عشاننا, ولو مجالنا نجيله

نحرق فى زرعة بلدنا , وغريمنا نعشق نجيله

صدام بدبحه اندبحنا, وغاصبنا بيهز ديله

مهما نثور واتناطحنا..مين اللى هايكون بديله؟

*****

داكان فارسهم , وفارس.. تلقاه فى كل الشدايد

ولاعمره ميل لريحهم, ولاكانش واقف محايد

وعشان يكون تحت ريحهم.. خلقو الفتن والمكايد

خلينا نحسبها بيننا.. هاتعود لمين الفوايد؟

*****

احنا اللى اخوة عروبه, والغرب دايما راصدنا

طول عمره حاقد علينا , ونفسه ينهب رصيدنا

ولاكانش مفروض علينا, ولاكان فيه شيئ غاصبنا

نفتح للكلبه تدخل.. تنهبنا وتغتصبنا

*****

ياصاحبى جفف دموعك..خللينى امسح دموعى

النار بتنهش فى لحمك, وليبها بنهش ضلوعلى

وانا اللى باسال وراكن على كسر نفسى وخضوعى

ايه اللى يشبع غريزتك..علشان ماعنتيش تجوعى؟

*****

مين اللى قال اننا ..تهنا او ضيعنا؟

ومين اللى قاصد بغله يخل اوضاعنا؟

ياشاربه دم البشر, وشبعتى من جوعنا

تستمتعى بذلنا , وادمنتى اوجاعنا

*****

الدم سال ع الشفايف, وبتلحسى الفكين

م المسجونين بين نيابك , او حتى م الفكين

لاتار مابيننا, ولااحنا كنا متعاركين

هاتعيشو دايما بعاركم, وتموتو متعكين

*****

بكره التاريخ ع الورق..يكشف فضايحكم

وشعوب كتير م الجيران, بالفضفضه يحكم

يقولو كلب السكك.. جه م الفضا يحكم

بإيد بتحضن, وايده التانيه دابحكم

*****

داسين سمومكو ف جيراننا وف كل مافريحنا

من يوم ماداست قدمكوالشينه مافرحنا

اما استجارت جارتنا.. هو اللى جاراحنا؟

مانت اللى أس البلا , وانت اللى جارحنا

*****

يشهد علينا الزمن.. لافى بيننا تار,ولادين

عروبتنا كانت أخوه..مش شرط م الوالدين

وعشان مصالح كلابكم ,غررتو بالولدين

كانو حضن واحد لأمه , مع انهم بلدين

*****

ياما قبلك كان جبابره , واتسحقو فى العلمين

سفك الدما كان غرامهم.. ورينا علا مين؟

ياللى انتى آفة زما ننا, ومشتته العالمين

احنا اللى لازم نقول لك :الدور ده جاى على مين؟


-------------------------------------

قصيدة : انا عاشق تراب أرضك . احمد رمضان الخطيب

انا عاشق تراب أرضك انا ابنك وانا رَاجلك
وانا اللى قلت من اجلك.. هاعيش العمر خدامك
هاحقق كل احلامك ..وانور كل قناديلك
وهارسم بسمه فى شفايفك
بلهفه وشوق واغنيلك



بغنوة حب على نيلك.. بتسعد كل ايامك
فداكى دمى ودموعى.. ياصرخة صوت بتألمنى
يامين ياناس يحكمنى
واكون رَاجلك



وقت الشده اكون قبلك.. واقول ازاي مانيش قبلك
وانتى ساكنه وجدانى.. وحبانى وانا حبك
هعيش حارس على بابك
والم فى كل احبابك ..واجمعهم على حبك
واصون عرضك


اكيد عارف ان قلبك أم
يحن بألف حضن يضم
ومن همسه يروح الهم
ورغم انى ملامحى جروح
اخبى دموعى واضحكلك
انا عاشق تراب أرضك ..انا ابنك انا رَاجلك


أِرمى كل احمالك على كتافى
وضمينى ادوق من حضنك الدافى
عشان البرد عدَى جوا شريانى

وخلا كل تلج يزيد
يتوه منى فى احزانى
ويتكوم ويبقى جليد

ياتعبانى و وخدانى
هاحطم كل زنازينى واقيم فرضك
هاشيل الدمعه من امسك
واتمنى اشوف شمسك

وازين كل خطاويكى
وابات على غصنك الأخضر .
واتمايل مع المنظر
ياعود سكر



انا اصلك وانا وصلك
واكتر حد فى الدنيا يكون حَسِك
انا ابنك انا رَاجلك
انا العاشق تراب أرضك

-------------------------------------------

ثوار - شريف عبد الفهيم
----
ثوار ... ثوار
وسط الظلم
ووسط القهر
ووسط النار
وسط العتمة
ووسط الضلمة
بين الدم وبين الهم
طول عمرنا هنكون ثوار
واوعى تفكر
إن سلاحك راح يحميك
دا احنا شبعنا ظلام وسجون ومرار
واسأل روحك
قبل ما يتهيألك إنك
راح تكسرنا أو تهزمنا
ما احنا كمان شاربين من نيلها
ياما لعبنا ف وسط غيطانها
واتمشينا ما بين حواريها
واما كبرنا
وعدت بينا سنين وسنين
جينا نرد جميلها علينا
فاكر نفسك
إنك إنت المصري لوحدك
وانك انت القادر وحدك
ما احنا كمان
علي حبها قادرين
صابرين
ليه مش قادر تفهم إني
باعمل ثورة عشانك وإني
كل ما بازعق واصرخ باحمي
عرضي وعرضك
أرضي وأرضك
واني باحاول أزرع ف ابنك
نخوة وعزة
وانه ف بلده يعيش بكرامة
فاكر انك بالدخان
راح تكسرني
وإني هاخاف لتيتم ابني
مانا ف الآخر هابقى شهيد
أصلي خلاص ما بقيتش بأخاف
أما ولادي فليهم رب
وانت ف يوم ما هتقدر تاني
تكسر نفسي
وتخليني منك أخاف
أو إني اجري منك تاني
وسط حواري ووسط دروب
ولا هاتخبى ف عتمة ليل
أصلي ف يوم ما هاموت هيقولوا
مت شهيد
واوعى تفكر إني باخاف
اني ف يوم ملقاش الزاد
أو ماعرفش اربي ولاد
ما انا لو خفت
راسهم راح هتطاطى وسط صحابهم
افهم بقى
ما انا مش ممكن ابطل أثور
طول ما في ف صدري نفس بيفور





----------------------------------------


مين اللى خان التانى كلمات أحمد شمس

مين إللى خـان الــتانى ... مـين إللى بات مظلوم
مين إللى كان الجــانى ... عـلـى حـبـيـبه فى يوم
غدر وخيانة فى طبعك ... ظــلـم وإهانـة فــ دمك
ياخسارة ألــف خسارة ... لو كان فى ناس بتحبك


بـتـبــيـع ولا بـتـقـدّر ... وبأغلى الناس بـتغدر
حابـب تـعـيشها وتأمر ... مغرور سفيه مـتـكـبر
أصل الجماال غواك ... وعشان كتير يـهــواك
تـكـسـر قـلوب حباك ... وتبيع فى ناس شرياك


كـــل الـلـى بـيـحـبـوك ... عـلـشـان جـمـالـك بـس
ولا لحظه يوم حسـوك ... وأنـــتـا ولا بـتـــحـــس
عشقوك عشان يغووك ... لطريق شيطان الـجـنس
خونت ودوست عـلـيا ... وأدى أخرتك شوف بص


مــاشــى بـتـصـرخ أه ... يخسارة عــّ اللى ضاع
إنتا إاللى قولت بنفسك ... وداع وألـــــــف وداع
مشيت ورا شــيـطانك ... ده شيطان سليط خداع
إشــرب مـــرار وألام ... وحـــس بــأالأوجــــاع


عرفتوا ميــن الخاين ... أظن كلامى باين
قلبى ده كان الصاين ... وهوه كــان بياع