الشاعر راضى على الطهطاوى قصيدة "متخافيشى"

متخافيشى
متخافيش


مهما
الهوجه تصول وتجول


رغم الموجه بعرض وطول


رغم عقارب
ويَّا فلول


بكرا الأزمه أكيد هتمر


**


رغم القلق
المالى عيونك


رغم الحاقد عايز يخونك


ربنا حافظك
هوا يصونك


ومحدش يقدر
ليكى يضر


**


مهما يحطوا
الشوك فى طريقك


بكرا
البسمه تعطر ريقك


والنجم
يغير من ضى بريقك


والضحكه
هتمسح طعم المر


**


اوعى الفكر
يجيب وى يودى


مهما يزيد
الريح هيهدى


بكرا
الغيمه أكيد هتعدى


والفرحه تخش
القلب تسر


**


مهما الموج
ينشال ينحط


هترسى
مراكبك فوق الشط


هيلمع اسمك
فوق الخط


ويملا
جناينك شجر الدر


**


مهما نشوف
للمكر نيبان


اوعى الدمع
عليكى يبان


سيبى الأمل
يدق بيبان


بعد ما
ابنك أصبح حر


**


متخافيشى
متخافيش


بكرا
الأزمه أكيد هتمر